Tre anni dopu ca ia ddentatu prevete, papa Caliazzu, fose numenatu arciprevete te Lucugnanu, le malelingue tiscenu ca lu vescuvu te Uscentu nu ttenia nisciunu autru te numenare, ma quista ete nn' autra storia.
Nnu ggiurnu ,papa Caliazzu fose mandatu te lu vescuvu te Uscentu cu fazza visita, a nume sou, alla marchesa te Lissanu ca saia bbuta sgravare ma la criatura nun bulia propriu cu nde saccia cu bb' essa
e bb' aia ggià nna semana ca stia menata intra llu liettu cu lle dogghie te lu partu, pe cquistu ia descisu cu mmanda papa Caliazzo cu nni fazza ssistenza spirituale.
Papa Caliazzu sciu a Lissanu e sse pèresentau allu marchese tiscendu ca ulia ffazza visita alla marchesa, quandu lu idde, la marchesa ni tisse:
" Arciprevete, servu te ddiu, iti comu stau cumbenata, sta criatura nun bbole bbessa, tie sinti ggiovene e le prechiere toui suntu ancora schette e sincere, preca ddiu cu mme libbera te stu malannu ca nun de pozzu cchiui "
A papa Caliazzu cu ssenta sta supprica ni inne nnu nnutu an canna comu puru a tutte le fimmine ca stianu addhrai, e, mentre stia cu ddica quarche cosa cu cunsula la marchesa, l' ecchiu ni cadde subbra nnu quatru ca stia an capetale te lu liettu, era nnu quatru te santa Libberataallora, senza nci pensa ddo fiate, ncignau a dicere a cantilena :
" Oh! mia santa Libberata
fà che dolce sia l' uscita,
come dolce fu l' entrata.
Oh! mia santa Libberata "
La marchesa te Lissanu capiu lu sensu te ste palore e ncignau a ritere forte, ma tantu forte ca lu marchesinu nsatau e sse ggirau tuttu te paru, se rompera le acque e nasciu senza mancu lu iutu te la mammana.
Te ddhru mumentu papa Caliazzu ncignau cu bbessa canusciutu comu nnu prievete ca sapia puru fare3 ddiertire li santi ca pe cquistu ni fascianu le grazzie.
Nessun commento:
Posta un commento