NNu pensieru a Lucio Dalla ca nu mmore mai,
sta canzune pare ca l' à scritta stammane.
A TUTTI LI CARUSI CU TUTTU LU CORE MIU
Se nd' à sciuta puru st' annata
tantu trista e mmalerata,
ca la ggente mo à lassata,
trista, fflitta e scunsulata.
Mo ni cunta quiddhru ddhrai :
" L' anno venturo avrem men guai,
la ripresa vedo vicina
l' anno venturo avrem fortuna".
Sessanta sei anni ca li sentu ,
ete sempre lu stessu cuntu,
sempre quiddhri , e ssu parecchi
ca ni cuntanu sti culacchi.
Ieu mo m' aggiu penziunatu
cu quattru sordi ca m' ane tatu,
ma isciu tutti sti carusi
ca ogne ggiurnu stanu mpisi.
Nu ssapenu propriu cce ffare
nu ttroanu nienzi pe' ffaticare,
e tocca alli ggenitori
cu lli campanu cu ssuturi.
Ieu nu ssacciu c' aggiu ddire,
cce nni pozzu augurare
ca lu bbene ca ni ogghiu
me porta poi allu scumpigghiu.
Perciò bbu dedicu stu penzieri
LU CRAI CU BESSA MEGGHIU TE IERI.
Nessun commento:
Posta un commento