Quandu le strate nu sse fascianu cu llu catrame e culle machine te moi, eranu o strate janche fatte cullu tufu, ca quandu passai se ntesaa nna pulvere ca fascia ddentare tuttu biancu quiddru ca 'ncera ddhra nnanzi, oppuru eranu fatte te terra bbattuta, mmienzu alli puteri; fra nna campagna e nn' autra se itenu ncora li segni te li carretti ca passanu e te l' erva ca crescia a 'ncoste alli segni e quandu chiuia se enchianu te acqua ca allampete nu sse putia propiu passare.
Nc' eranu puru le strate fatte culla breccia, eranu le strate chiù importanti, quiddhre intra lle città, addhu ianu passare le carrozze te li signuri ca ianu bb' essere cchiù commute e cu lle fazzanu ianu bbesegnu te cristiani ca ianu spaccare le petre te petra ia cu lle fazzanu ddentare piccicche cu sse pozzanu spianare bbone.
Ianu stare tuttu lu ggiurnu sutta llu sule, allu ientu o all' acqua e cu nna mazzola e nna mazzetta ( la mazzola, pe ccinca nu lla sape, ete nnu martieddhru ca pisa finca nnu chilu e mmienzu, la mazzetta invece ete martieddhru te nna parte, mentre te l' autra spiccia a punta, ianu spaccare le petre ca pesanu nnu saccu e ll' ianu ffare ddentare breccia.
Li carrettieri ca purtanu lu fricciu te la cava, fascianu tanti muntuni te petre te fricciu, ogmi muntune era te nnu metru cubbu te fricciu ca poi lu cazzafricciu ia spaccare, iddhru se mentia subbra a ogne muntune e quandu lu spicciaa passaa a nn' autru muntune.
Quandu lu cazzafricciu ia spicciatu, poi rrianu l' autri operai e spiananu tuttu, cu ppreparanu la strata addhu alla fine enia misa la catrame
Osce la petra ia la usanu pe ffare li muretti a siccu e li moderni cazzafricciari usanu sulu la mazzetta, ma ete nna fatia mutu cchiù professionale e cchiù leggera.
Nessun commento:
Posta un commento