PROVERBI E DINTORNI - LI CUNTI E LI CULACCHI

N.B. :
Questo CUNTU è in dialetto Leccese, chi volesse leggerlo in Italiano può farlo al seguente link
http://www.abruzzoinmostra.it/letteratura/imbriani_01/la-novellaja-fiorentina-di-vittorio-imbriani-pagt0664.htm

LU TRIANNISCIA

Nc' era nna fiata nnu mmassaru ca tenia nna mugghiere e tre figghi, lu Paziu, lu Ntoni e lu Trianniscia, lu Trianniscia, lu ngiuranu ccussine percene sciarpisciaa e bbera nnu picca fessacchiottu.
Muriu la mugghiere e lu sire chiamau li figghi e nni tisse:
" Figghi mei, la mamma oscia ha morta e fra nnu picca me tocca puru a mie, me raccumandu quandu rimaniti suli cu bbu cchujti quiddhru ca bbu lassu, ieu tegnu ddo oi e nna vacca ca pare ca ole mmore te nnu momentu cu ll' autru, li ddo oi bu li lasso a bbui ca siti bbueni, però la vacca tatinila allu Trianniscia ".

Muriu lu sire e lli figghi ficera comu n' ia tittu lu sire, allora lu Trianniscia cce ffisce ?
Ccise la vacca e ' mpise la pelle subbra nn' arberu te pire cu sse secca bbona bbona, quandu s'aia siccata se la ' mpise a ncanna e scia girandu pe lli paisi sunandu lu tamburru,
Nnu giurnu, mmienzu a nna campagna nc' eranu tre latri ca se sta spartianu lu bbottinu te nnu furtu ca ianu fattu, passau te ddhra nnanzi lu Trianniscia sunandu lu tamburru, li latri sentendu lu suenu se mparuara e tissera fra de iddhri sta rrianu li carabbinieri, scappamundeni, e ccussì fiscera; lu Trianniscia ttruau li sordi e sse lli pigghiau,turnau a ccasa e nni li musciau alli frati soi ca ni ddummandara comu ia fattu cu ttroa tanti sordi.
Lu Trianniscia respuse :
"Aaggiu ccisa la vacca e m' aggiu enduta la pelle ",
Li frati soi allora tissera fra de iddhri fascimu comu à fattu lu Trianniscia, cussì guadagnamu sordi puru nui, ccisera li oi e mpisera le pelli subbra nn' arberu te pire cu sse siccanu bbone bbone, poi scera intra lla chiazza e ncignara a rretare :
" Ci ole sse ccatta le pelli a centu ducati lu pilu ? "
Rriara li carabbinieri e lli carcerara, percene se pensanu ca le pelli eranu rrubbate.
Quandu essera, lu Pazziu e llu Ntoni ulianu ncatascianu bbuenu bbuenu te mazzate lu frate ca intantu ia sciutu allu paise cu nna cista e nni tisse a nnuu cantinieri :
" Me raccumandu ca ieu sta bbau alla chesia cu mme bba sentu missa, cu nu lla tocca nisciunu ".
Quandu turnau nu ttruau cchiui la cista, percene li servi te lu cantinieri l' ianu pigghiata cu nci mintenu intra li strunzi te li maiali, allora ncignau cu fazza questioni cu ll' oste ca cu nu llu senta ni tisse :
" Cu nu tte sentu, pigghiate sti centu ducati e abbande ".
Cu ddhri sordi se ccattau nnu cavaddhru e sciu a intra lla chesia addhu sta seppellianu nna cristiana, se scuse intra nu confessionale e spettau cu rria la notte; a notte fatta, scopriu la bbara e nde lliau ddhra mprta, la mise subbra allu cavaddhru e b' inne a Lecce, sciu a nn'autru cantinieri, ca sapia ca tene tre bbeddhre figghie e nni tisse ca ia scire cu ssente missa e cu stescia attentu a ddha cristiana ca sta ddurmia, cu nu lla disturba nisciunu ; sciu alla chesia e quandu turnau fice finta ca l' ia ttruata morta e ' ncignau cu fazza questioni puru ddhrai, lu cantinieri allora ni tisse :
" Sienti, cu nu tte sentu cchiui ieu tegnu tre figghie, tutte bbeddhre te nde tau una, sceglite quiddhra ca te piace e pigghiatela ".
Turnau a ccasa cu ddhra beddhra piccinna allora li frati tissera fra te iddhri :
" pigghiamulu , taccamulu, mentimulu intra nnu saccu e menamulu a mmare cu sse nfoca ".
E ccussì sta ffascianu, quandu rriara nnanzi allu paise, pijiara lu saccu e llu menara rretu a nnu parite, cu bascianu alla putea cu sse bbianu nnu bbicchieri te mieru e cu sse riposano nnu picca ca s' ianu stancati.
Passau te ddhra nnanzi nnu pecuraru sunando nna sampogna, idde ddhru saccu e tisse ci sape cce ncete ddhra intru e ss vvicinau, lu Trianniscia allora tisse ;
" Ieni e bbiti ccussì essu ieu e trasi tie qua intra e te guadagni centu ducati "
Lu pecuraru apriu lu saccu e lu Trianniscia essiu e chiuse intra lu pecuraru, turnara li frati soi e
 pigghiara lu saccu, llu futtera a mmare e sse nde sta turnanu  a ccasa tescendu ni ndamu libberati, quandu iddera ssettatu subbra llu parite lu Trianniscia ca sta sunaa la sampugna allora tissera :
" Mmara a nnui, quistu ete nnu tiaulu, ca ni ppigghia pe cculu ".