PROVERBI E DINTORNI - LI CUNTI E LI CULACCHI

LA CUMMARE FURMICULICCHIA

Addhu te giri ggiri, trei sempre cunti, storie e culacchi ca suntu cangiati rispettu a autri posti, uei percene lu dialettu canga, uei percene la ggente l'à cangiati cuntanduli, pe stu fattu suntu nnu picca diversi te nnu postu cu ll' autru, ma la sustanza rimane però sempre quiddhra.

Nc' era nna fiata nna furmiculiccha ca, scupandu a 'nterra, ttruau nnu sordu e ' ncignau cu pensa,:
Ce nde fazzu te stu sordu, me lu ccoju; e se poi lu perdu?
Meju cumme nde ncattu quarche cosa, e ccene me nde possu ccattare?
Me nde ccattu caramelle, none ca poi me chiamanu cannaruta;
Me ccattu carne; no carne no, tene l' osse e poi me 'nfocu;
Me ccattu pisce! none, tene le spine e me pungu.
E ddopu tantu tiempu e tanti raggionamenti finalmente se decise cce ss' aja ccattare :
" Me ccattu nnu nastru russu; ccussì me lu mintu alla festa e mme ttrou nnu maritu ".
Dopu ca l' ja ccattatu. ose sse lu prova e sse mise alla fenescia cu ddhru bbeddhru nastru russu neu,neu.
Propriu ddhru mumentu se ttruau a passare te ddhra nnanti nnu oi ca la idde e nni tisse ;
" Comu si bbedhra cuumare furmicalicchia, uei mme spuesi? "
E iddhra respuse:
" Famme ssentere comu canti, ca se me piasce te sposu ".
L' oi allora se mise a cantare cu ddhra usce soa, e quandu spicciau la furmiculicchia ni tisse :
" None cumpare oi, cu ddhra usce me faci 'nsatare e mpaurare ".
Passara nnu cane, nnu musciu, nna crapa ma tutti quanti tenianu usci ca alla furmiculicchia nu nni piascianu; se ttruau a passare nnu surgicchiu ca puru iddhru ni ddummandau se ulia sse lu sposa e la furmiculicchia ni tisse cu canta, allora lu surgicchiu se mise a cantare e ffascia PI,PI,PI,
Sta usce ni piasciu alla furmiculicchia ca lu ose pe mmaritu.
Dopu ca s' ianu spusati, nna duminica ca la furmiculicchia e lu surgicchiu ianu sciuti 'lla chesia, la

LA QUATARA

furmiculicchia ni tisse allu surgicchiu cu bbascia a ccasa e ccu controlla la carne ca ia misa a cuscenare, lu surgicchiu sciu a ccasa e b' ulia cu lla ssaggia cu bbiscia comu era, se ' nfacciau tantu intra lla quatara addù sta bbolia la carne, ca nci catiu intra e sse cuscenau puru iddhru.
Spetta, spetta,  ia rriata menzatia e lla furmiculicchia s' ia stancata ca lu maritu nun ci rriaa allora sciu a ccasa cu lle amiche soi cu llu cerca .
Quandu rriau 'ccasa e bidde quiddru ca n' ia successu a maritusa, se mise a chiangere e le amiche soi ni tinnera cumpagnia e lla furmiculicchia rimase veduva e chiangia sempre tescendu:
" Surgicchiu miu surgicchiu,
t' à cuettu a 'mpignaticchiu,
la petra a'ncapitale, 
surgicchiu miu, comu aggiu fare ?".
Ca lu surge à bbessere curiositusu e bbole sse ficca intra tutte le parti.
Pe quistu li surgi se sposanu cu lli surgi e lle farmicule cu lle furmicule.