PROVERBI E DINTORNI -li culacchi te papa Caleazzu

IEU SUNTU PAPA CAJAZZU
FASCITI COMU IEU BBU TICU MA NU FFASCITI COMU IEU FAZZU

MANNAGGIA LLI PASULI

A Lucugnano ncera nna bbona cristiana ca quandu lu maritu essia la matina cu bba zzappa la terra, se trasia ccasa lu cumpare e passaa quarche ura curcata cu iddhru.
Nnu giurnu, lu maritu ca saia scerrata la zzappa a ccasa,se turnau cu llu pija e. dopu ca l'ia ttruatu passau cu saluta mujeresa ca fisce finta ca sta ddurmia.
La salutau e se nde sciu cu fatica, ma strata fascendu, ni inne lu suspettu ca ni paria ca intrallu liettu ia iste ddo capu e nu ssulu quiddhra te mujeresa,
Allora pensau, stasira aggiu ssapire e continuau cu fatica.
Intantu la mujere, ca nia enutu lu suspettu cu nu ssia maritusa se ndia ccortu te lu cumpare, sta cercaa nna bbona scusa cu nni mmenescia se iddhru ni tescia quarche cosa.
Siccomu nu nni enia nienzi a ncapu, allora sciu cu chieda cunsiju alla papa Caliazzu, percene era nnu bbeddhru rufianu e sapia tenire la ucca chiusa.
Papa Caliazzu quandu sippe quiddhru ca ni cuntau la fimmena, e saputu ca lu maritu la sira prima ia mangiati li pasuli, ni tisse a ddhra cristiana ;
"Nu tte preoccupare, moi nci pensu ieu".
Pigghiau lu breviariu, e se nde sciu a campagna addu sta fatiaa lu maritu, quandu rriau ddhra nnanzi, tisse retandu :
- " Buon giorno a tutti sti cristiani ca sta ffatianu ".
Lu maritu se uardau a ngiru e tisse a papa Caliazzu ;
- " Arciprete, ma nu bbiti ca stua sulu ? ".
- " Tocca mme perduni, mannaggia lli pasuli ".
- " Ecce centranu mo li pasuli sci ssignuria viti doppiu ? " .
- " Propiu quistu ete lu prublema, quandu la sira me mangiu li pasuli, la matina poi isciu tuttu a ddoppiu, tisci ca stai sulu, ma ieu te iscu a ddoi, ete tutta curpa te li pasuli, ma me piascenu e mme li mangiu lu stessu ".
Lu cuntatinu nci pensau nnu picca susu e poi tisse ;
Mu sta capiscu cce mma successu stamatina, e ccussine ni spiecau allu papa Caliazzu quiddhru ca nia parsu cu bbiscia.
Allora papa Caliazzu ni tisse ;
"A istu ca te succete puru a tie, se moi i turnatu a ccasa stasira cunvintu te quiddhru ca te paria ca ii istu, ii ccusatu ddhra santa cristiana te mujereta te nna curpa ca nu ttene.