Se poi uardamu le storie te li paisi, etimu ca quasi tutti li paisi tenenu nna storia, nnu cuntu oppuru nnu meraculu ca à fattu lu santu protettore te ddhru paise.
Ieu nu nci crisciu ne a ddiu ne alli santi e mancu a ste storie, ma siccomu fascenu parte te le cose ca muta ggente nci crite, bbu le cuntu ccussine bbu putiti mparare le storie ma parecchia ggente nu ssape.
Lu santu cchiù canusciutu qua mmera a lecce, ete santu Ciseppu te Cupirtinu, forse percene ete natu a ddhru paise o percene pare ca ogne ttantu se sentia nnu passaru e sse mentia cu bbola e pare puru ca è fatti tanti meraculi.
Pare ca siccomu nu riuscia cu ffazza nienti e bbera puru nnu picca fessacchiottu, se decise cu sse fazza monecu, pare puru ca li sami cu trase intra llu cumentu li superau percene se raccumandau alla matonna e iddhra ni fisce la crazzia cu nni fazza recurdare tutte le cose ca ni ddummdara.
A Cupirtinu se cunta ca quandu era ncora iu, fascia meraculi e pe cquistu la nquisizione lu chiamau cchiui te nna fiata cu saccia se fascia quarche truccu, ma nu riuscira mai cu llu ccusanu te nienti e pe cquistu lu mandara a tanti autri paisi cu llu tegnanu luntanu te Cupirtinu.
Dopu ca morse lu cuerpu fose purtatu a Cupirtinu e ddhrai stae seppellitu intra llu santuariu
Fra lli meraculi ca se tisce ca à fatti, ncete puru quiddhru te nna piccinna ca nu putia camenare e ca iddhru fisce guarire quandu bbasciau lu crucefissu.
Nessun commento:
Posta un commento