PROVERBI E DINTORNI - li cunti e li culacchi

Li cunti ca le nonne cuntanu alle piccinne, eranu nnu picca diversi te quiddhri ca cuntanu alli streisceddhri; quasi sempre ddhri cunti parlaanu te principi azzurri, fate ca fascianu spusare vagnone cu ggiovanotti beddhri e ricchi e ca poi finianu sempre ca vivianu cuntenti e felici, ricchi e nnamurati.

Me recordu nnu cuntu ca parlaa te nna fata ca vivia intra nna casa fatta te petre scuncignate ( e ggia percene le fate vivianu intra lle campagne e sutta ll' arberi quasi sempre nnanzi a quarche casa catuta, mmienzu alle petre ) sta fata la sira se mentia cu fazza li ricami allu scuru spettandu cu passa quarche beddhra stria e cu lla saluta gentilmente ccussi ni putia purtare la furtuna cu lla fazza spusare cu nnu ggionane beddhru te quiddhri ca sapianu amare le fimmene e ca le trattanu comu reggine.
Siccomu intra llu paise tutti sapianu ca ddhra fata stia ddhrai, ma nisciunu lia mai ista, nnu carusu, curiusitusu, ulia cu lla iscia e sse scuse nnu ggiurnu rretu all' arberu cu la iscia; quandu rriau la sira, la fata essiu te la casa mmienzu lle frasche e sse mise sutta ll' arberu addu stia ddhru carusu cu sse minte a rricamare, lu carusu essiu te rretu ll' arberu e, quandu se ndaccorse la fata se mise a rretare, percene le fate le putianu bbitere sulamente le fimmene e nu li masculi, pe cquistu la fata spariu e nisciunu la idde cchiui.
Te ddhru mumentu ogne ssira, nnanti ll' arberu se sentia nnu lamentu ca  paria nnu chiantu e ddhru chgiantu paria essire propiu te intra ll' arberu.
Quarche annu rretu, ddhr' arberu nde lanu tajatu e te ddhru mumentu nu ssa ntisu cchiui  ddhru chiantu.

Quasi ogne ssira tante caruse anu nnanti ddhr' arberu cu bbiscianu se ttroanu la fata ma nisciunu là bista cchiui
La ggente osce nu crite cchiui a ste storie, ma se sciati mmera a Caddhrinu, ete facile ca ttruati quarche bbecchia ecchia ca bbu cunta nna storia simile e fforse bbu cunta puru ca tddhra ddhra fata laje vista.