Ieu suntu apa Caliazzu fasciti comu ieu bbu ticu
ma nu fasciti comu ieu fazzu
LI PIETI E LE CORNE
Comu tutti li masculi, e li prieveti nu ssuntu te menu, quandu etimu nna bbeddhra fimmena, cercanu tutte le strate cu biscianu se nci potenu fare quarche cosa.
Ncera a lu Cugnanu, nna carusa ca s'ia spusata te picca e l' arci prievete Caliazzu sta cercaa cu bbiscia se nde bbuscaa quarche cosa, ma nu ttruaa mai nisciuna scusa bbona, ntantu lu tiempu passaa.
Rriau lu mumentu ca s' ia ffare la metetura e tandu, comu a quarche annu rretu, li meteturi scianu a autre reggioni cu faticane, percene a ddhri posti pajane te cchiui e sse putianu minetere quarche sordu te parte.
Ntantu ddhra cristiana ia rumasta ncinta, lu maritu partiu cu bba fatica e la lassau ccasa sula.
Papa Caliazzu, ca autru nu spettaa, passaa sempre ddhra nnanti ccasa cu bbiscia se ni ccappa nnanti, e nnu giurnu se la idde susu lla porta te casa nfacciata, llora ni tisse :
" Bongiornu Cummare "
" Bongiornu a ssignuria arciprevete "
" Uarda bbiti, stai ncinta " ?
" Porpiu ccussine, arciprevete "
" Fatte bbitere nnu picca - tisse papa Caliazzu uardandula mentre iddhra se mentia mposa cu lla ascia megghiu - e marituta addhù stae " ?
" À partutu alla metetura, arciprevete "
Papa Caliazzu ddhru mumentu se muscia preoccupatu :
" A, a partutu ? Santu ddiu e moi comu faci ? ddhru discrazziatu te marituta se nd' à sciutu senza ccompleta l' opera ".
Ddhra carusa se preoccupau a ste palore te lu papa, e ni ddummandau ;
" Cce bb' oi ddisci papa, comu nu ave completatu l' opera " ?
" Eh si figghia mia, marituta, prima pparta ia bbuta completare l' opera, mo stu fuju te nasce senza li pieti, marituta nu ni l' à misi "
Ddhra carusa scoppiau chiangere e se nginucchiau nnanzi a papa Caliazzu :
" Papa miu, comu aggiu ffare? tocca mme iuti ssignuria, cunsijame iti se pueti fare quarche cosa , ieu nnu fiju senza pieti nu llu oju "
Papa Caliazzu, fisce ca nci penza nnu picca e poi tisse a ddhra cristiana :
" Vabbene mo iscu cce nci pozzu fare ieu ".
Trasiu ccasa cu ddhra carusa e sse sacrificau a postu te lu maritu cu nni ncoddha li pieti allu fijiu.
Quandu turnau te la metetura lu maritu, ddhra vagnona, tutta ncazzata ni tisse ca nu mb' era quiddhru u modu sse cumporta e nni cuntau tuttu lu fattu; lu maritu se ncazzau ma nu nni tisse nienti alla mujere percene ulia sse vindica cu papa Caliazzu, e percene ia capitu puru ca iddhra nc' ia ccappata senza ccapisca nienzi.
Rriau la dduminica, Papa Caliazzu ca tenia nnu fundu cu tanti nimali, crape, maiali, vacche e tanti autri, ose ca tutti quiddhri ca faticane pe iddhru ianu scire lla chiesia cu sse iscianu la missa e cu sse cunfessanu.
Lu maritu te ddhra carusa, pprufittandu te stu fattu, sciu allu fore te papa Caliazzu e nni tagghiau tutti li pieti te ddhri nimali.
Quandu li culoni se nd' accorsera chiamara papa Caliazzu, ca se ncazzau e quandu sta turnaa llu Cugnanu, ttruau pe strata lu cristianu te li pieti ca ni tisse :
" Cce t' à successu arciprevete, te sta bbisciu mutu nervosu ".
" Quarche fetente, à tagghiati li pieti a tutti li nimali mei ".
" E percene te sta lamenti, tie li sai fare bbueni li pieti, nu ni li mentisti tie li pieti a fijuma "?
E papa Caliazzu ca ia capitu tuttu respuse:
" Eh si, a fijuta n' aggiu misi lii pieti, e a tie le corne ".
I PIEDI E LE CORNA
Come tutti i maschi, ed i preti non lo sono da meno, quando vediamo una bella donna che cj piace, cerchiamo di trovare le strade per riuscire a combinarci qualcosa.
C' era a Lucugnano, una ragazza sposata da poco e l' arciprete Galeazzo se ne era invaghito, perciò cercava di trovare qualche strada per poter concluderci qualcosa, senza riuscire peraltro a trovare una valida scusa, intanto il tempo passava.
Giunse così il tempo della mietitura ed alora, come ancor oggi, i braccianti e mietitori si recavano in altre regioni dell' Italia meridionale per lavorare, i salaari erano più alti e così si riusciva anche a mettere qualche soldo da parte.
Intanto la ragazza, oggetto delle attenzioni di papa Galeazzo, era incinta quando i marito partì per andare a lavorare e la lasciò sola in casa.
Papa Galeazzo che altro non aspettava, passava spesso vicino a quella casa per poter "casualmente" incontrare la donna, così un giorno che la vide sull' uscio le disse :
" Buon giorno, comare "
" Buon giorno, arciprete "
" Guarda, guarda, sei incinta? "
" Proprio così, arciprete "
" Fatti guardare un po' - disse papa Galeazzo guardandola mentre lei si metteva in posa perchè la vedesse meglio - e tuo marito dov' è ? "
" È partito per la mietitura, arciprete "
A queste parole, papa Galeazzo si fece vedere preoccupato :
" È, è partito ? Santo dio, e adesso come fai ? quel disgraziato di tuo marito è partito senza completare l' opera ".
Preoccupata dalle parole del prete, la ragazza chiese :
" Cosa vuoi dire, prete, come non ha completato l' opera ? "
" Eh si, figliola mia, prima di partire, tuo marito doveva comlpetare l' opera, ora questo figlio ti nascerà senza piedi, tuo marito non glieli ha messi ".
La ragazza scoppiò in lacrime ed inginocchiandosi davanti a papa Galeazzo disse :
" Prete mio, cosa posso fare ? devi aiutarmi tu, consigliami, vedi se puoi fare qualcosa, io un figlio senza piedi non lo voglio ".
Papa Galeazzo, dopo aver pensato un po' disse alla ragazza :
" Va bene, fammi vedere se posso fare qualcosa io ".
Entrò in casa con la ragazza e comlpetò l' opera lasciata a metà dal marito.
Quando il marito tornò dalla mietitura, la ragazza, incazzata, gli disse che non era quello il modo di comportarsi e gli raccontò la storia dei piedi del figlio e dell' intervento risolutore del prete; il marito si arrabiò ma non disse nulla alla moglie poichè meditava di vendicarsi del prete ed anche perchè aveva capito che la moglie ci era cascata molto ingenuamente.
Giunse la domenica e, papa Galeazzo, che possedeva una fattoria fuori Lucugnano, dove teneva molti animali, capre, maiali, mucche ed anche altre specie da cortile, voleva che qurl giorno tutti i suoi coloni, mezzadri e braccianti, assieme alle famiglie, ossero in chiesa per ascoltare la messa, confessarsi e comunicarsi.
Approfittando di questo fatto, il marito della ragazza, andò alla fattoria di papa Galeazzo e tagliò i piedi a tutti gli animali.
Quando i coloni tornarono e videro ciò che era accaduto, chiamarono papa Galeazzo che alla vista di quello scempio, s' infuriò e, mentre tornava nervoso a Lucugnano, incontrò l' autore del misfatto che gli chiese :
" Cosa ti è accaduto, arciprete, ti vedo molto nervoso "
" Qualche birbante ha tagliato i piedi a tutti i miei animali "
" E di che ti lamenti ? tu li sai mettere bene i piedi, per caso, non li hai messi tu i piedi a mio figlio ? "
E papa Galeazzo, capito tutto rispose :
" Eh si ! a tuo figlio misi i piedi e a te le corna ".
Nessun commento:
Posta un commento