PROVERBI E DINTORNI - l' arti e li mestieri antichi

Tisce lu pruerbiu ca l' arte te lu tata ete menza mparata; li siri nesci, quandu tenianu li figghi ca ncignanu cu bbascianu alle scole elementari, la sira, cu nu lli tegnanu mmienzu lla strata, li purtanu
cu iddhri alle putei ca tenianu, ci era falegname, ci ferraru e tutti li vagnuni, puru senza ffazzanu nienti,  sulamente uardandu, quarche cosa la mparanu, e se poi nu ttenianu la putea, ncera sempre nnu barbieri ca ni servianu vagnuni cu spazzulanu le giacche alli clienti ca sianu tagghiati li capiddhri. o cu nni bba ccattanu lu cafè o le sigarette.
Li vagnunceddhri fascianu ste fatie e sse bbuscanu quarche ssordu te mancia e bbera quiddhra la paga ca ni tuccaa, e quarche ffiata eranu li siri loru ca scusu te li vagnuni, ni tianu allu bbarbieri li sordi ca n' ianu ddare, tantu poi li vagnuni ni li tianu a rretu cu nni li ccogghenu pe cquandu sianu ccattare le scarpe o li libbri o quarche autra cosa ca ni putia sservere.
A Lecce,sullu corsu, nnanzi a Porta Rusce, nc'era nnu barbieri addu moi anu misu nnu bbarra e all' angulu te coste, ncera la putea te li sordomuti, li sordomuti eranu ccerti ecchi ca ccunzanu le scarpe ca sianu scasciate, e bbendianu puru le sigarette sfuse, quandu essiu la legge ca li tabbacchini nu lle putianu indere cchiui, li sordomuti continuara cu lle indanu, stianu pierti sempre, notte e giurnu, megghiu te la farmacia e quandu nui eramu vagnunceddhri cu teniamu picca sordi sciamu a ddhrai e ni nde ccattammu puru una sula ca ni la passammu a quatru o cinque.
Mute fiate, poi, cinca scia an giru cu cconza le cose ca sianu scsciate a ccasa lli cristiani, se purtantu li figghi cchiù randiceddhri cu nni tescianu nna manu e cu ssemparanu lu mestieri.
Osce invece li vagnuni anu scire alla scola fina a 16 anni e nu potenu fatiare, la Paghetta ni la tanu li siri loru poi, quandu criscenu nu ssapenu fare nienti però quandu olenu cu ffatianu, la prima cosa ca ddummandanu ete:
" Quantu me tai ? "
E se pe ccasu allu sire ni pare picca, ni tisce allu vagnone ca ddhri sordi ni li tae iddhru, e cu nu bbascia cu fatia pe ddhra miseria.
Olenu ffannu tutti li mpiecati e nisciunu ole cchiui cu fazza fatie pesanti, pe cquiddhre ncete li marucchini, ca mancu iddhri olenu cchiui cu lle fannu.